अमेरिका भिसा अन्तर्वार्तामा नयाँ मापदण्ड लागू

काठमाडौं — काठमाडौंस्थित अमेरिकी दूतावासले भिसा अन्तर्वार्ताका लागि नयाँ मापदण्ड लागू हुने जानकारी गराएको छ।

दूतावासका अनुसार आगामी वैशाख १५ गतेदेखि सबै भिसा आवेदकले अन्तर्वार्तामा उपस्थित हुँदा डिएस-१६० भिसा आवेदन फारमको कन्फर्मेसन बारकोड नम्बर अनिवार्य रूपमा साथमा ल्याउनुपर्नेछ।

दूतावासले स्पष्ट पारेको छ कि भिसा अन्तर्वार्ताको लागि अनलाइनमार्फत लिइएको अपोइन्टमेन्टमा प्रयोग गरिएको कन्फर्मेसन नम्बर र बारकोड नम्बर एकआपसमा मेल हुनुपर्छ। यदि नम्बरहरू मेल नभएमा, आवेदकलाई अन्तर्वार्तामा समावेश गराइने छैन।

त्यस्ता अवस्थामा आवेदकले नयाँ अपोइन्टमेन्ट बुक गरी आवेदन प्रक्रिया अघि बढाउनुपर्ने दूतावासले जानकारी दिएको छ।