काठमाडौं महानगरभित्र ५०० बालबालिका सार्वजनिक सवारीमा श्रमिक

काठमाडौं । काठमाडौं महानगरपालिकाले महानगर क्षेत्रभित्र सञ्चालित सार्वजनिक सवारीसाधनमा श्रमिकका रूपमा काम गर्ने बालबालिकाको तथ्यांक संकलन गरेको छ । अध्ययनानुसार, महानगरभित्र सञ्चालित सार्वजनिक सवारीसाधनमा ४८९ बालबालिका सहचालकका रूपमा कार्यरत छन् ।

महानगर क्षेत्रभित्र गुड्ने सार्वजनिक सवारीसाधनमा सहचालकका रूपमा काम गर्ने ४८९ बालकमध्ये १४३ जना १४ वर्षमुनिका छन् । चक्रपथ परिक्रमा गर्ने रुटमा मात्र ९२ बालकले सहचालकका रूपमा काम गरिरहेका महानगरले जनाएको छ ।

महानगर क्षेत्रभित्र सञ्चालित सार्वजनिक सवारीसाधनमा सहचालकका रूपमा काम गरिरहेका बालबालिकामध्ये १४ जनामा दीर्घकालीन रोग र संक्रमण देखिएको महानगरको अध्ययनमा देखिएको छ ।

४८९ बालबालिकामध्ये करिब २०० जनाले परिवारको कमजोर आर्थिक अवस्थाका कारण सहचालकका रूपमा काम गरिरहेका अध्ययनमा देखिएको छ ।

बालश्रम निषेधित भए पनि महानगर मात्र नभई काठमाडौं उपत्यकाभरि सञ्चालित सार्वजनिक सवारीमा ठूलो संख्यामा बालबालिका सहचालकका रूपमा कार्यरत छन् ।