नेपालमा  पूर्वराजा ज्ञानेन्द्र शाहको कुनै राजनीतिक अस्तित्व छैन: लोसपा अध्यक्ष ठाकुर

लोकतान्त्रिक समाजवादी पार्टी (लोसपा) नेपालका अध्यक्ष महन्थ ठाकुरले पूर्वराजा ज्ञानेन्द्र शाहको वर्तमान नेपालमा कुनै राजनीतिक भूमिका र औचित्य नरहेको टिप्पणी गरेका छन्।

बुधबार काठमाडौंको बबरमहलस्थित पार्टी केन्द्रीय कार्यालयमा नयाँ वर्षको अवसरमा आयोजित शुभकामना आदानप्रदान कार्यक्रममा बोल्दै ठाकुरले, राजा व्यवस्था इतिहास बनिसकेको बताउँदै शाहलाई ‘पूर्वराजा’ भनेर सार्वजनिक रूपमा सक्रिय भइरहनु अनौचित्यपूर्ण रहेको धारणा राखे।

उनले पूर्वराजाले नयाँ वर्ष र फागुन ७ का अवसरमा दिएका सार्वजनिक अभिव्यक्तिहरूप्रति असन्तुष्टि जनाउँदै ती अभिव्यक्तिहरू संवैधानिक व्यवस्थाप्रति अनादरजनक रहेको संकेत गरे। “राजा त गइसके, उनीसँग अब कुनै राजनीतिक अधिकार छैन। तर पनि उनी आफूलाई पूर्वराजा भन्दै सार्वजनिक स्थलमा देखा परिरहेका छन्,” ठाकुरले टिप्पणी गरे।

उनको भनाइमा, पूर्वराजाले संसदीय व्यवस्थालाई औपचारिक रूपमा स्वीकारे पनि व्यवहारमा त्यसलाई आफ्नो अधीनमा ल्याउने प्रयास देखिन्छ। उनले यस्ता गतिविधिलाई “अनुचित र लोकतान्त्रिक मूल्यविपरीत”को संज्ञा दिएका छन्।