मन्त्री पौडेलद्वारा सरकारी अस्पतालमा बिरामीको चाप घटाउन सुरक्षा निकायसँग सहकार्यको प्रस्ताव

काठमाडौं । स्वास्थ्य तथा जनसंख्या मन्त्री प्रदीप पौडेलले सरकारी अस्पतालमा बिरामीको चाप घटाउनका लागि सुरक्षा निकायका अस्पतालहरूसँग सहकार्य गर्न प्रस्ताव गरेका छन्।

प्रहरी महानिरीक्षक र सैन्य अधिकारीहरूसहित सेनाद्वारा सञ्चालित स्वास्थ्य सेवाका प्रमुखहरूसँगको बैठकमा मन्त्री पौडेलले सरकारी अस्पतालमा बिरामीको चाप व्यवस्थापन गर्न सुरक्षा निकायका अस्पताललाई सहकार्यको प्रस्ताव राखेका हुन्। उनले, “यदि सुरक्षा निकायका अस्पतालमा अपरेशन वार्ड खाली हुन्छ भने, त्यहाँ सेवा उपलब्ध गराउने सहकार्य गर्न सकिन्छ,” भने।

मन्त्री पौडेलले सरकारी अस्पतालमा सिफ्ट थप्ने र अतिरिक्त समयमा पनि काम गरेर चाप व्यवस्थापन गर्ने प्रक्रिया भइरहेको जानकारी दिँदै, “जब सरकारी अस्पतालमा चाप बढ्छ, तब सुरक्षा निकायका अस्पताललाई रेफर गरेर उपचार दिने तरिका अपनाउन सकिन्छ,” भने।

साथै, उनले सुरक्षा निकायका अस्पतालमा अन्य सरकारी सेवाहरू समेत उपलब्ध गराउन र स्वास्थ्य बीमा कार्यक्रमलाई प्रभावकारी बनाउनका लागि सुझाव मागेका छन्।

यस सन्दर्भमा, मन्त्री पौडेलले गत साता सुरक्षा निकायका अस्पतालसँग सहकार्य गरेर सरकारी अस्पतालमा चाप व्यवस्थापन गर्न कार्यदल बनाएका थिए। यस कार्यदलको नेतृत्व डा. टंक बारकोटीले गरेका थिए।

मन्त्री पौडेलले बैठकमा नेपाल सेनाले आपतकालीन अवस्थामा गर्भवतीहरूको सुत्केरी सेवामा गरेको योगदानको प्रशंसा गरे। साथै, तराईमा सर्पदंशको उपचारमा सेनाले प्रदान गरेको सहयोगको पनि सराहना गर्दै, मन्त्रालयसँग सहकार्य गर्नका लागि सेनालाई तयार रहेको बताए।