राष्ट्र बैंकले आज ४० अर्ब रुपैयाँ बजारबाट झिक्दै तरलता व्यवस्थापन गर्ने

राष्ट्र बैंकले बैंक र वित्तीय संस्थाहरूमा अत्यधिक तरलता व्यवस्थापन गर्नका लागि आज फेरि ४० अर्ब रुपैयाँ बजारबाट झिक्न लागेको छ।

राष्ट्र बैंकले निक्षेप संकलन उपकरणमार्फत २१ दिनका लागि यो रकम झिक्ने प्रक्रिया सुरु गरेको हो।

आज दिउँसो २ बजेसम्म बैंक र वित्तीय संस्थाहरूलाई अनलाइन बोलकबोलमा भाग लिन आह्वान गरिएको छ।

निक्षेप संकलनका लागि १० करोडको न्यूनतम र ५ करोडको अधिकतम रकमले बोलकबोल गर्न सकिने व्यवस्था गरिएको छ। यो प्रक्रिया ब्याजदरमा हुनेछ र बहुब्याजदरमा पनि बोलकबोल गर्न सकिने राष्ट्र बैंकले जनाएको छ।

‘क’, ‘ख’ र ‘ग’ वर्गका बैंक तथा वित्तीय संस्थाहरू मात्र यस प्रक्रियामा सहभागी हुन पाउनेछन्, र खरिद गरिएको निक्षेप संकलन उपकरण अन्य बैंकमा धितोको रूपमा प्रयोग गर्न सकिने पनि सूचनामा उल्लेख छ।