देवकी तिमल्सिना निर्वाचित उपाध्यक्षमामा

हुम्लाको सर्केगाड गाउँपालिको उपाध्यक्षमा नेकपा माओवादी केन्द्रका देवकी तिमल्सिना विजयी भएकी छन्। आइतबार भएको उपनिर्वाचनको अन्तिम मतपरिणामअनुसार तिमल्सिना १ हजार ६३६ मत ल्याएर विजयी भएकी हुन्।

सोमबार सकिएको मत परिणामअनुसार निकटतम प्रतिद्वन्द्वी नेपाली कांग्रेसकी सविता बुढाले १ हजार ५९४ मत पाएकी छन्।
एमालेबाट उम्मेदवार जाना शाहीले १ हजार १३२ मत पाएकी छन्।

यस्तै राप्रपाका उम्मेदवार संगीता शाहीले ५१, राष्ट्रिय स्वतन्त्र पार्टीका उम्मेदवार बाँचा बुढाले २५, स्वतन्त्र उम्मेदवार नरेश शाहीले ९ मत ल्याएका छन्।

यसअघि कांग्रेस र माओवादीबीच गठबन्धन गरी चुनाव लड्दा सर्केगाडको उपाध्यक्षमा माओवादी उम्मेदवार निर्वाचित भएका थिए।

२०७९ मा गठबन्धनबाट उपाध्यक्षमा विजयी भएका माओवादीका चन्द्रसिंह कार्कीको गएको भदौ ४ गते गाडी दुर्घटनामा परि मृत्यु भएको थियो।