बार्सिलोना विरुद्ध पुनरागमन जितसहित एट्लेटिको मड्रिड शीर्ष स्थानमा

 बार्सिलोना विरुद्ध २-१ को पुनरागमन जित हात पार्दै एट्लेटिको मड्रिड स्पानिस ला लिगाको शीर्ष स्थानमा उक्लेको छ ।

वैकल्पिक खेलाडी अलेजान्डर सोर्लोचले इन्जुरी टाइमको छैटौं मिनेटमा गोल गरेपछि एट्लेटिकोले रोमाञ्चक जित हात पार्दे अंकतालिकामा पनि बार्सिलोनालाई नै पछि पारेको हो ।

त्यसअघि खेलको ३०औं मिनेटमा पेड्रीले गावीको पासमा गोल गर्दै बार्सिलोनालाई अग्रता दिलाए । पहिलो हाफमा बार्सिलोनाले अग्रता कायम राखेपनि दोस्रो हाफमा गोल व्यहोरेको थियो ।

६०औं मिनेटमा एट्लेटिकोका रोड्रिगो डे पलले गोल गर्दै खेल १-१ को बराबरीमा पुर्‍याए । त्यसपछि खेल बराबरितर्फ अग्रसर थियो । तर सोर्लोथले नाहुल मोलिनाको पासमा खेलको इन्जुरी टाइममा गोल गर्दै एट्लेटिकोलाई जित दिलाएका हुन् ।

जितपछि एट्लेटिको १८ खेलबाट ४१ अंक जोडेर शीर्ष स्थानमा उक्लेको छ । पराजित बार्सिलोना भने १९ खेलबाट ३८ अंकसहित दोस्रोमा छ ।