लेखा समिति सभापतिकी श्रीमती अदालतमा हाजिर हुनुपर्छ : योगेश भट्टराई

काठमाडौं । नेकपा एमालेका सांसद योगेश भट्टराईले सार्वजनिक लेखा समितिका सभापतिकै बारेमा आर्थिक लेनदेनमा कुरा उठेको बताएका छन् । सोमबार समितिको बैठकमा माओवादी सांसद अमनलाल मोदीले समिति सभापति ऋषिकेश पोखरेलको राजीनामा माग गरेका थिए । 

त्यसलगत्तै बोलेका एमाले सांसद भट्टराईले समिति सभापति ऋषिकेश पोखरेलप्रति लक्षित गर्दै आर्थिक लेनदेनमा आफू ठिक ठाउँमा उभिए मात्रै अरूमाथि डन्डा चलाउन सकिने बताए । उनले भने, ‘‘सभापतिको श्रीमती अदालतमा हाजिर हुन जानुपर्छ, जानुहुन्छ । न्यायिक निरुपणमा जानुहुन्छ भन्ने विश्वास छ ।’’

समितिको सभापति कुन पार्टीको बनाउने भनेर निर्वाचनअघिको भद्र सहमतिका आधारमा बनाइएकाले राजनीतिक तहमा समझदारी गरेर उपसभामुख, राष्ट्रिय सभा अध्यक्षलगायत सबै पदाधिकारी अदलबदल गर्न सकिने उनले बताए । 
 
कांग्रेस प्रमुख सचेतक श्यामकुमार घिमिरेले समितिमा अदलबदल गर्नुपर्ने भए नेतृत्व तहबाट हल गरेर जानुपर्ने बताए । सभापति दलगत प्रतिनिधित्व गरेर आएको भन्दै उनले लेखा समिति सभापतिकी श्रीमती सहकारीमा जोडिएको कुरा न्यायिक निरुपणको विषय भएको बताए ।